Loğman Etibar Şəmiyev

Mən Loğman Şəmiyev, inşaat mühəndisiyəm. 2024-cü ildə Akdeniz Universiteti İnşaat mühəndisliyi fakültəsini 3.35/4 GPA ilə başa vurmuşam, hərbi xidmətimi isə 2025-ci ildə tamamlamışam. Metal konstruksiya dizaynı, Bina İnformasiya Modelləməsi (BİM), dəmir-beton tikili dizaynı, layihə idarəçiliyi, həmçinin zaman və xərclərin idarə olunması istiqamətlərində zəruri bilik və praktiki təcrübələrə sahibəm. Yenilikçi layihələrdə iştirak etməyə və peşəkar bacarıqlarımı daim inkişaf etdirməyə böyük həvəs göstərirəm.

​

Karyeram ərzində müxtəlif qurumlarda dəyərli təcrübələr qazanmışam. "HYDROTRANS Mühəndislik Mərkəzi" MMC-də Hidrotexnik-Layihəçi mühəndis kimi çalışarkən Horadiz şəhəri tullantı sularının təmizlənməsi qurğularının layihəsində iştirak etmiş, yağış kanalizasiyası və drenaj sistemlərinin hidravlik hesablamalarını, içməli su və yanğın suyu anbarlarının dizaynını, həmçinin Pirallahı balıq yetişdirmə təsisinin layihələndirilməsini icra etmişəm. Eyni zamanda yol layihələrinin eninə və boyuna kəsiklərinin çıxarılması və texniki sənədlərin hazırlanması işlərini həyata keçirmişəm. Bundan əlavə, "LOADEX" MMC-də satış nümayəndəsi kimi çalışaraq tələb olunan məhsulların çertyojlarının çəkilib sifarişə verilməsini, anbar-satış işlərinin koordinasiyasını və müştəri məmnuniyyətini təmin etmişəm.

​Türkiyədə "AULA İnşaat Mimarlık Mühendislik" MMC-də texniki ofis mühəndisi kimi fəaliyyət göstərərək dəmir-beton bina dizaynı, armatur və beton metrajının çıxarılması, texniki rəsmlərin analizi və hesabatların hazırlanması proseslərində yer almışam. "Qəsr İnşaat" MMC-də isə sahə mühəndisi olaraq sahə fəaliyyətlərinin izlənilməsi, SƏTƏM qaydalarına əməl olunması, texniki rəsmlərin ustalara izahı, qəlib, armatur və beton işlərinin sahədə tətbiqi, eləcə də kranın montajı prosesində təhlükəsizlik tələblərinin öyrənilməsi istiqamətində təcrübə qazanmışam.

İş prosesində AutoCAD, SAP2000, Tekla Structures, Sta4CAD, Allplan, Bentley WaterCAD, Civil 3D, SaS Planet, Google Earth və MS 365 proqramlarından peşəkar səviyyədə istifadə edirəm. Ana dilim olan Azərbaycan dilindən əlavə, türk dilini C2, ingilis dilini B2, rus dilini isə A2 səviyyəsində bilirəm. Analitik düşüncə, problem həlletmə, məsuliyyətli yanaşma, sürətli öyrənmə və kritik anlarda təmkinli qalmaq kimi şəxsi keyfiyyətlərim komanda işinə tez adaptasiya olmağıma və hədəflərimə uğurla çatmağıma şərait yaradır.